لێدان یان سزادانی جەستەیی منداڵ دەتوانێت کاریگەریی دەروونی قووڵ و بەردەوامی هەبێت لەسەر منداڵ . لێکۆڵینەوەکان بە بەردەوامی نیشانمان دەدەن کە سزای جەستەیی دەتوانێت زیانبەخش بێت بۆیە لێرە باوترین دەرەنجامە دەروونیەکان دەخەینەڕوو.
زیادبوونی دڵەڕاوکێ و خەمۆکی:
ئەو منداڵانەی کە لێیان دەدرێت ئەگەری تووشبونیان زیاترە بە: دڵەڕاوکێی درێژخایەن، خەمۆکی، کەمبوونی هەستی باوەڕبەخۆبوون ئەمەش لەبەر ئەوەی هەستی سەلامەتی و متمانە و سەقامگیری سۆزداریان لە لایەن ئەوکەسانەوە تێکدەچێت کە بڕیارە بیانپارێزن.
شەڕانگێزی و ڕەفتاری توندوتیژی:
زۆرجار منداڵان فێر دەبن توندوتیژی ڕێگەیەکی قبوڵکراوە بۆ :
چارەسەرکردنی کێشەکان
کۆنترۆڵکردنی ئەوانی تر
بێزاری دەربڕین
ئەمەش دەتوانێت ببێتە هۆی زیادبوونی شەڕانگێزی لە ماڵەوە و لە قوتابخانە و دواتر پەیوەندیەکان.
خراپی دەربڕینی هەستەکان:
منداڵانی سزادراوی جەستەیی لەوانەیە کێشەیان بۆ دروست ببێ لە دەربڕینی هەستەکانیان وەک: توڕەیی، ترس، یان دڵتەنگی چونکە
بەهۆی دەربڕینی هەست و سۆزەوە سزا دراون
فێری ڕێگەی تەندروست نەکراون بۆ دەربڕینی هەستەکانیان
خراپی دەرەنجامی ئەکادیمی:
سزای جەستەیی دەتوانێت کاریگەری لەسەر توانای منداڵ هەبێت بۆ تەرکیزکردن و فێربوون و ئەنجامی باش لە قوتابخانە.
هەروەها دەتوانێت ببێتە هۆی گۆشەگیری لە ڕووی کۆمەڵایەتیەوە وە بە شێوەیەکی نەگونجاو مامەڵە بکەن.